• Иван Димовски
Ватерполо репрезентацијата на Хрватска ќе игра во финалето на Европското првенство кое се одржува во Сплит. „Коцкестите“ во полуфиналето ја победија Италија во „Спаладиум Арена“ со 11-10, со што ја израдуваа својата публика и закажаа меч за трофејот против Унгарците в сабота.
Се играше крајно неизвесен натпревар, уште од стартот играта одеше гол за гол. „Аѕурите“ двапати поведуваа, а домаќинот се враќаше, за потоа Хрватите да дојдат до 3-2, резултат со кој заврши првата четвртина. Водени од сплитската публика домашните ватерполисти имаа контрола, Италија еднаш поведе до полувремето, а на пауза се замина со хрватско водство од 6-5.
Иако на стартот „коцкестите“ дојдоа до +2, следеше мини-серија на гостите за егал (7-7). На тоа одговор од Хрватите имаше со два гола за 9-7, а во последниот период се влезе со гол предност за домашните. На стартот на последната четвртина следеше размена на голови, но во завршницата Хрватска успеа да дојде до клучните 11-10. Италијанците имаа шанса за егал, ама голманот Бијач одново се истакна и одбрани шут со играч помалку, за големо славје на публиката.
Хрватите одат на мегдан со Унгарија за трофејот на Европското првенство в сабота во 20:30 часот, а претходно Италија ќе се судри со Шпанија во „малото финале“.