• Мартин Танасковски
Александар Зверев имаше добар старт на завршниот мастерс во Торино откако во првото коло го совлада Бен Шелтон со 2-0 во сетови. Германскиот тенисер, трет на светската АТП листа го искористи своето искуство. Натпреварот траеше еден час и 33 минути, а по сетови резултатот беше 6-3, 7-6(6) во корист на Зверев.
Во првиот сет Зверев веднаш покажа доминација, постигнувајќи брејк во петтиот гем за 3-2, што му овозможи да ја контролира динамиката на мечот. Тој ја задржа предноста до деветтиот гем, создавајќи три сет/брејк шанси, од кои втората ја искористи за конечни 6-3 и водство.
Вториот сет беше многу поизедначен. Ниту еден од тенисерите не успеа да направи брејк, и натпреварот се решаваше во тај-брејк. Шелтон започна поуспешно, водеше со 4-0 и создаде три сет-топки, но Зверев покажа голема психолошка сила.
Германскиот тенисер успеа да ги спаси сите и со серија од четири освоени поени дојде до меч-топка, која ја искористи за конечна победа.
