• Мартин Танасковски
Александер Зверев без поголеми проблеми обезбеди пласман во четвртфиналето на Ролан Гарос, откако во осминафиналето го совлада Холанѓанецот Јеспер де Јонг со 3-0 во сетови (7-6, 6-4, 6-1).
Германецот најголем отпор имаше во првиот сет, кој траеше повеќе од еден час. Де Јонг поведе со 3-0 по раниот брејк, но не успеа да ја задржи предноста. Зверев возврати, а потоа во тај-брејкот сигурно ја заврши работата. Во продолжението најдоброрангираниот преостанат тенисер на турнирот целосно ја презеде контролата. Со брејк во десеттиот гем го освои вториот сет, а во третиот експресно стигна до двоен брејк и убедлива победа по нешто помалку од два и пол часа игра.
Во четвртфиналето Зверев ќе игра против сензационалниот Рафаел Ходар. Деветнаесетгодишниот Шпанец направи голем пресврт против својот сонародник Пабло Карењо Буста и победи со 4-6, 4-6, 6-1, 6-2, 6-2. За Ходар ова е прво четвртфинале на Грен слем турнир во кариерата, додека Зверев ќе се обиде да ја искористи отворената ждрепка во Париз и конечно да стигне до својата прва Грен слем титула.
Интересно е што овогодинешниот Ролан Гарос донесе бројни изненадувања и елиминации на фаворитите, па од тенисерите од Топ 10 на АТП-листата во завршницата останаа само Александер Зверев и Феликс Оже-Алијасим.
