• Горан Упале
Љубителите на тенисот денес ќе уживаат во големото финале на Вимблдон, каде што на Централниот терен во „Ол Ингланд Клаб“ ќе се сретнат светскиот рекет број еден Јаник Синер и второпласираниот на АТП-листата, Александар Зверев. Двајцата ќе се борат за најпрестижниот трофеј на тревната подлога во меч кој со право го носи епитетот дерби на генерацијата.
Синер во финалето влегува како бранител на титулата и голем фаворит. Италијанецот одигра извонреден турнир, а во полуфиналето со максимални 3-0 во сетови го елиминира седумкратниот шампион Новак Ѓоковиќ, со што испрати силна порака дека е подготвен за нов голем успех.
Од другата страна ќе биде Зверев, кој игра во фантастична форма по освојувањето на Ролан Гарос. Германецот без поголеми проблеми стигна до финалето, откако во полуфиналето убедливо го совлада домашниот миленик Артур Фери. Со евентуална победа, Зверев ќе ја освои својата прва титула на Вимблдон и ќе стане првиот тенисер во Опен ерата кој по првиот грен слем трофеј веднаш освоил и втор во низа.
Меѓусебниот скор е целосно на страната на Синер. Италијанецот води со 10-4 во дуелите и има девет последователни победи над Зверев, што му дава и дополнителна психолошка предност пред денешното финале. Сепак, тревата е специфична подлога, а моќниот сервис на Германецот може да биде неговото најсилно оружје во обидот да ја прекине негативната серија.
