• Иван Димовски
Американскиот новинар Џони Олексински од „Њујорк пост“ предизвика големо внимание со текстот во кој директно порача дека Новак Ѓоковиќ и Венус Вилијамс треба да стават крај на своите кариери.
Повод за неговата анализа беше елиминацијата на двајцата ветерани уште во првото коло на УС Опен. Ѓоковиќ загуби од Маријан Навоне по пет сета, а во текот на мечот имаше сериозни физички проблеми, повраќаше, добиваше грчеви и во еден момент се расплака.
„Стадионот „Артур Еш“ практично изгледа како геријатриско одделение оваа година. Двајца тенисери кои имаат околу 40 години играа на најголемиот тениски стадион во светот: Новак Ѓоковиќ (39) и Венус Вилијамс (46). Како што се очекуваше, двајцата беа елиминирани во првото коло. Ѓоковиќ го направи тоа на драматичен начин кој беше тежок за гледање. Повраќаше неколку пати, имаше грчеви, а потоа се расплака. Може ли овие луѓе конечно да се пензионираат?“, пишува Олексински.
Олексински посебно се осврна и на Стен Вавринка, кој на 41 година настапи на УС Опен со специјална покана. Сепак, тој признава дека Ѓоковиќ и останатите ветерани се меѓу најголемите во историјата.
„Стен загуби во три сета од 30-годишниот Матео Беретини, а во третиот сет не освои ниту еден гем. Среќен пат. Нема сомнение дека овие ветерани се меѓу најголемите играчи на сите времиња. Статистички, со 24 Гренд слем титули, Ѓоковиќ е најдобриот тенисер на сите времиња, иако речиси сигурно тој ја нема 25-тата титула во себе“, заклучува Олексински.
Овој коментар не им се допадна на навивачите на Новак Ѓоковиќ кои го нападнаа Олексински.
