• Мартин Танасковски
Италијанскиот тенисер Јаник Синер продолжува со одличните настапи на последниот грен-слем турнир сезонава – УС Опен. Во натпревар од второто коло тој со убедлива игра го совлада Австралиецот Алексеј Попирин со 6-3, 6-2, 6-2 и обезбеди пласман меѓу најдобрите 32 во Њујорк.
Попирин минатата година приреди сензација елиминирајќи го Новак Ѓоковиќ, но овојпат не успеа да најде начин да му се спротивстави на агресивниот и прецизен Синер, кој доминираше од почеток до крај.
Италијанецот уште во воведниот сет постави висок ритам, правејќи брејк во вториот гем и стекнувајќи предност од 3-0. И покрај тоа што имаше проблем со десната нога и мораше да повика физиотерапевт, Синер без поголеми тешкотии ја затвори првата делница во своја полза.
Вториот сет донесе уште поизразена разлика. Светскиот број еден веднаш му го одзеде сервисот на противникот, а иако во шестиот гем мораше да спасува четири брејк топки, успеа да остане цврст и со нов брејк во седмиот гем поведе со 2-0 во сетови.
Во третиот сет Попирин накратко имаше можност да се врати во мечот кога при резултат 1-1 не искористи две брејк шанси. Синер тоа го казни со одземен сервис и од таму ја контролираше играта до конечниот триумф. Во следното, трето коло, 23-годишниот Синер ќе се соочи со Канаѓанецот Денис Шаповалов, кој во четири сета беше подобар од Французинот Артур Рожер со 7-6, 3-6, 7-6, 6-3.
ФОТО: Jannik Sinner / Х
