• Саше Љолес
Полската тенисерка Маја Хвалинска после финалето на Ролан Гарос против Мира Андреева, изјави дека противничката заслужено го освоила трофејот, упатувајќи пофални зборови за нејзината игра.
Хвалинска беше вистинска сензација во Париз и стигна до големото финале, каде немаше сили за уште еден голем и историски подвиг во нејзината кариера.
„Мира беше на висина на задачата. Точно знаеше што сака и како да пристапи кон мечот. Јас грешев, но се трудев да останам во игра. Немав сили за нешто повеќе, иако дадов максимум од своите можности.
Ѝ благодарам на оваа прекрасна публика за поддршката, се надевам дека следната година ќе успеам да одиграм на истото ниво. Честитки за Андреева, го освои трофејот сосема заслужено“, рече Хвалинска.
Русинката Андреева го освои својот прв Грен-Слем трофеј во кариерата, а за Хвалинска ова беше неверојатно патување, исполнето со голема возбуда и одлични тениски партии.
