• Горан Упале
Данил Медведев беше елиминиран во првото коло од овогодинешниот УС Опен, но за време на натпреварот во пет сета доживеа ментален пад поради недозволено одење на фотограф на теренот, во моментот кога Бенџамин Бонзи сервираше за меч поен.
Во исто време, публиката реагираше долго и бурно, насочувајќи го својот гнев кон претходно непознатиот Селџук Аџар, а сега американскиот фотограф со турско потекло проговори за тоа што направил и што подоцна доживеал.
„Бев жртва и сум целосно невин. Овој инцидент веќе се претвори во линч, иако воопшто не сум виновен. Многу страдав. Ако има камера на стадионот што снимала сè, таа ќе покаже дека двапати го прашав стјуардот дали можам да излезам на теренот и не го направив тоа. Дури кога ми рече дека натпреварот е завршен и дека можам да излезам на теренот, го направив тоа. Не знаев дека Медведев ме видел... Остарев десет години од синоќа“, тврди медиумскиот ветеран, со долго искуство во известување за спортски и други настани.
Организаторите на Грен слем турнирот во Њујорк, секако, имаат поинаква верзија за шокантниот инцидент, тврдејќи дека на фоторепортерот му било јасно кажано да остане во место. Исто така, на Аџар експресно му беше одземена акредитацијата и повеќе нема да може да фотографира од терените на УС Опен.
