• Саше Љолес
Младата руска тенисерка Мира Андреева испиша историја на годинашниот Ролан Гарос, освојувајќи ја својата прва Грен слем титула на само 19 години. Во финалето во Париз таа ја совлада полската тенисерка Маја Хвалињска со 6-3, 6-2 и ја круниса извонредната турнирска недела со само еден загубен сет на патот до трофејот.
По победата, Андреева не ја криеше емоцијата и призна дека моментот е уште посебен од сè што замислувала.
„Направив многу визуализации пред турнирот и често сонував како го освојувам трофејот. Но чувството во реалниот живот е многу подобро отколку во соништата. Кога ќе го погледнам трофејот, сфаќам дека ова навистина се случи и дека можам да се наречам Грен слем шампионка“, изјави Андреева по мечот.
Русинката посочи дека клучот за успехот бил менталниот пристап во текот на турнирот, особено во финалето кое се играше во тешки и ветровити услови.
„Условите беа навистина тешки, ветерот постојано го менуваше правецот. Среќна сум што останав фокусирана и смирена. Во најважните моменти си повторував дека нема шанси да го загубам овој меч“, рече новата шампионка на Париз.
Андреева откри дека во последните месеци многу работела на психолошката подготовка и дека голема улога во нејзиниот напредок има нејзиниот тим и спортскиот психолог со кого редовно соработува. Таа нагласи дека денес има многу поголема доверба во советите што ги добива од својот стручен штаб.
Со триумфот во Париз, Андреева стана една од најмладите Грен слем шампионки во поновата тениска историја и потврди дека е една од најголемите ѕвезди на новата генерација во женскиот тенис.
