• Саше Љолес
Јиржи Лехечка продолжува со настапите на турнирот во Токио, откако чешкиот тенисер избори место во четвртфиналето со победа над Французинот Уго Умбер со 5-7, 6-4, 6-4.
Мечот траеше два часа и 10 минути, а Умбер подобро го започна дуелот. Во првиот сет двајцата тенисери сигурно го чуваа својот сервис, но Французинот успеа да направи брејк во 12. гем и со тоа да стигне до предност.
Лехечка, сепак, не дозволи натпреварот да му избега. Во вториот сет го искористи својот момент, направи брејк и го израмни резултатот, а потоа во третиот сет повторно еднаш му го одзеде сервисот на противникот. Чешкиот тенисер ја искористи првата меч-топка и го затвори натпреварот.
Во борбата за полуфинале Лехечка ќе игра против Парагваецот Адолфо Даниел Ваљехо, кој приреди изненадување со убедливата победа над Матео Беретини од 7-6/6, 6-1.
Во другата четвртфинална пресметка ќе се сретнат Карлос Алкараз и Даниел Шаповалов. Шпанецот со 7-6/6, 6-1 го совлада Матео Арналди, додека Канаѓанецот во три сета беше подобар од Чилеанецот Алехандро Табило со 7-5, 3-6 и 6-4.
