• Мартин Танасковски
Иако со години важи за спортист кој внимателно ја штити својата приватност и ретко дозволува јавноста да ѕирне зад кулисите на неговиот семеен живот, Никола Јокиќ направи исклучок. Српскиот ас и член на Денвер Нагетс ги отвори вратите од својот дом во Денвер за потребите на подкастот „X&O’s chat“, чиј домаќин е спортскиот коментатор Един Авдиќ.
Станува збор за редок и ексклузивен увид во приватниот простор на трикратниот добитник на МВП признанието во НБА лигата, нешто што досега јавноста можеше да го види само во скромни кадри. Претходно, дел од ентериерот беше забележан во текот на посетата на селекторот Светислав Пешиќ, но овојпат камерите понудија далеку подетална слика за атмосферата во која живее еден од најдоминантните кошаркари на современиот спорт.
Подкаст-тимот, кој во моментов реализира турнеја низ Соединетите Американски Држави со цел интервјуирање истакнати личности од светот на кошарката, доби можност да разговара со Јокиќ во неговата вила во Денвер. Разговорот, покрај професионалните теми, откри и дел од личната страна на кошаркарот, мирниот амбиент во кој минува време со семејството, како и просторот во кој се наоѓаат симболите на неговите најголеми спортски достигнувања.
Домот на Јокиќ, според виденото, одразува едноставност и функционалност, со внимателно избрани детали што сведочат за неговата кариера во најсилната кошаркарска лига во светот. Трофеите, признанијата и спомените од историските успеси со Денвер Нагетс се интегрирани во просторот на дискретен начин, како потсетник на патот што го изминал од Сомбор до врвот на НБА.