• Иван Димовски
Рони О'Саливен е веројатно најдобриот снукер играч на светот. Сега, тој стана и највозрасниот шампион во историјата на овој спорт, откако О'Саливен го освои првенството на Обединетото Кралство.
Во финалето О'Саливен го совлада кинескиот ривал Џунхуеј Динг со 10-7. По дневната сесија резултатот беше 4-4, а потоа фаворитот дојде до нов трофеј со кој влезе во историските книги.
О'Саливен ја освои осмата титула во Обединетото Кралство и со тоа инкасира 250.000 фунти. Тој го крена својот 40-ти трофеј во кариерата. Интересно е дека О'Саливен, освен највозрасен, своевремено беше и најмлад освојувач на првенството на Обединетото Кралство во 1993 година.