• Мартин Танасковски
Словенечката ски-скокачка Ника Превц ја одбрани титулата на новогодишната турнеја „Две ноќи“, бидејќи победи во Оберстдорф, еден ден по триумфот во Гармиш-Партенкирхен.
Оваа 19-годишна Словенка ја постигна единаесеттата победа, а сестрата на познатиот ски скокач Петер Превц славеше со скокови од 122 и 134,5 метри (311,9 поени). Норвежанката Ана Одине Стрем го освои второто место со скокови од 129 и 132 метри (304,5 поени), додека нејзината сонародничка Еирин Марија Квандал го освои третото место со скокови од 122,5 и 139 метри (300,1 поени).
Во генералниот пласман на турнејата „Две ноќи“ победи Превц со 587,7 бодови, Квандал заврши на второто место со 568,7 бодови, а третата позиција ѝ припадна на германската натпреварувачка Катарина Шмид со 547,8 бодови.