• Горан Упале
Ниту во десеттата партија предизвикувачот Јан Непомњашчим не најде рецепт за победа против најдобриот на светот. Битката за титулата светски шампион во шах е пред самиот крај, затоа што Магнус Карлсен со денешното реми по 41 потег има водство од 6,5-3,5 и на само еден поен до одбрана на титулата.
Карлсен во ниту еден момент не дозволи противникот да влезе во предност и со систематски промени ја насочи играта кон изедначена завршница, па Непомњашчим одново мораше да се помири со поделбата на поенот.
Утре е слободен ден, а единаесеттата партија, во кој предизвикувачот ќе ја има предноста од почетниот потег ќе се игра во петок на десетти декември.
До крајот на финалето преостануваат уште четири партии, а на најдобриот на светот му е потребен уште еден поен, за да ја потврди доминацијата во светскиот шах.