• Горан Упале
Невидена драма во Сингапур, каде се одлучува кој ќе биде светски првак во шах. Остануваат уште само две партии (потенцијално) до крајот на оваа пресметка, но засега сè е изедначено. Во понеделникот бранителот на титулата Лирен Динг со бели фигури по речиси четири часа и 39 потези го совлада предизвикувачот Гукеш Домараџу во дванаесеттата партија од оваа пресметка.
Ding with the comeback! Gukesh resigned in a hopeless position before mate! 6-6 with only 2 more games to play in the World Championship! https://t.co/H6twdJmLHu #DingGukesh pic.twitter.com/8z1kQ1MJH2
— lichess.org (@lichess) December 9, 2024
Резултатот во финалето сега е 6-6, а форматот на натпреварувањето предвидува 14 класични партии пред да се влезе во „тај-брејкери“. Вторник е ден за одмор, а во среда од 10:00 часот по средноевропско време, Гукеш ќе игра со бели фигури во тринаесеттата партија.
Неверојатен кам-бек во ова финале приреди Динг, кој беше отпишан по единаесет партии по колосалната грешка која ја направи. Тогаш Гукеш доби, мислеа многумина, огромна психолошка предност, но 32-годишниот велемајстор од провинцијата Жеџијанг не се откажа.
По поразот Гукеш бил обземен од негативни емоции, а „Гардијан“ забележа дека во еден момент дури и бил во солзи. Индиецот, кој во минатото беше член на македонскиот клуб Прилеп, штотуку стана полнолетен и го брка рекордот на Гари Каспаров и се надева дека ќе стане најмладиот светски шампион во историјата на шахот.