• Мартин Танасковски
Единствениот македонски претставник кој остана во еврокуповите, екипата на ЖРК Вардар, се наоѓа пред елиминација затоа што на домашен терен доживеа пораз (25-35) од холандски Јуро Унирек во рамки на ЕХФ Европскиот куп.
- Комплетниот натпревар на ЖРК Вардар и Јуро Унирек:
Вардарки одиграа допадливо, меѓутоа немаа сила да се носат со противникот. Поразот пристигна поради подобрата игра на Холанѓанките во второто полувреме, кога успеаја да ја „скршат“ одбраната на ЖРК Вардар и да ги казнат сите грешки.
Натпреварот во СЦ „Јане Сандански“ тргна рамноправно, а по средината, односно петнаесеттата минута од натпреварот, Јуро дојде до првата посериозна предност. Од 6-7, гостинот замина на 7-10, потоа беше и 12-15, но со два врзани гола на Дамјаноска и Трпевска пред крајот на првото полувреме, на паузата резултатот гласеше 17-18 за гостинките.
Главната разлика холандските гостинки ја направија со две мини-серии од по два гола. Првата беше кога од 22-24 се казнија двете технички грешки на вардарки и се замина на 22-26, додека втората беше кога од 24-26, гостинот замина на 24-28, а потоа по исклучување на Џатевска следеше и гол за 24-29. Така, последните десет минути од мечот беа само рутина за Јуро и преку одлични контри и брза игра се запиша сигурна двоцифрена победа пред реваншот.
Најдобра кај ЖРК Вардар беше Михаела Стојановска со седум постигнати гола, пред Бојана Диневска и Ивона Трпевска со по четири гола, а кај Јуро, Есма Стал имаше дури единаесет постигнати гола. Реваншот на двата тима е за седум дена во Холандија.
