• Горан Упале
Екипата на Еурофарм Пелистер, по стартниот пораз од Колштад во Битола, пред себе го има првото овосезонско гостување во Лигата на шампионите.
Македонскиот првак веќе е во Данска, каде в среда ќе се судри со Алборг. Новајлијата во редовите на данскиот тим Алекс Влах, го најави дуелот со „зелено-белите“ и вели дека ги чека средба со типична балканска екипа.
„Сум играл против Пелистер и претходно и се работи за типичен балкански тим. Ако ги пуштиш во борба, тие се подготвени да удрат и да го искористат тоа во своја полза. Во исто време, се работи за многу физички силен тим, па мораме да им покажеме дека сме господари во нашата куќа и дека ова е нашиот дом. Ние сме фаворити, играме на домашен терен и верувам дека ќе стигнеме до победата. Треба да ги повториме добрите работи од последните натпревари, да наметнеме силно темпо од самиот почеток и што порано да се одлепиме резултатски“, изјави Влах за клупската интернет страница.
Натпреварот меѓу Алборг и Еурофарм Пелистер започнува од 20:45 часот, а ЕХФ за главни судии ги делегираше Шпанците Марин Љоренте и Гарсија Серадиља.
