• Горан Упале
Македонскиот шампион Еурофарм Пелистер се „сели“ во Германија, каде го чека уште еден тежок тест во ракометната Лига на шампионите. Моќниот Магдебург ќе биде предизвикот на „зелено-белите“ во шестото коло од новата сезона во елитата.
Тренерот на бундеслигашот, Бенет Вигерт со суперлативи зборуваше за нашиот шампион, но потенцира дека посакува нова победа пред домашната публика.
„Еурофарм Пелистер е тим кој, со своите трансфери летово, уште еднаш ги истакна своите амбиции. Тоа се рефлектираше и во неодамнешните резултати во Лигата на шампионите, каде што имаа неколку тесни натпревари. За нас, важи истото како и секоја седмица. И покрај многуте натпревари, сакаме да бидеме на вистинскиот пат и да ја прославиме победата со нашите навивачи“, рече тренерот на германскиот гигант.
Натпреварот во Германија се игра в четврток со почеток од 20:45 часот. Во досегашниот дел од сезоната пелистерци имаат една победа и четири порази, додека Магдебург е единствен со максимални пет победи.
