• Иван Димовски
Ракометарите на Вардар 1961 ја оправдаа фаворитската улога и го совладаа Бутел со 42-27 во натпреварот од петтото коло на плеј-офот во Суперлигата на Македонија. Натпреварот кој се одигра во малата сала при СЦ „Јане Сандански“ во целост му припадна на фаворитот кој беше убедлив.
- Комплетниот натпревар меѓу Вардар 1961 и Бутел Скопје:
Бутелци парираа само на стартот на средбата до 3-3, а потоа Вардар почна да гради предност. Иако беше и 5-4, фаворитот заигра посигурно. По десетина минути игра вардарци почнаа да се одлепуваат, бидејќи од 8-6 направија серија од 5-0. До полувремето Бутел немаше решение за играта на домаќинот и на одмор се замина со 21:13.
Во продолжението тимот на Иван Чупиќ продолжи во ист ритам. Предноста продолжи да расте, а двоцифрената маргина беше пробиена во 39. минута со голот на Гоце Георгиевски за 28-18. Оттаму веќе се беше јасно, па до крајот Вардар само дополнително се одлепи против гостинот и убедливо победи.
Најефикасен во таборот на Вардар беше Јака Малус со осум реализации, додека исто толку даде и Дејан Милосављевиќ кај Бутел.
На вардарци до крајот на сезоната им се потребни уште две победи во завршните пет рунди за да ја вратат титулата во Скопје.
