• Симеончо Стоиков
Македонскиот ракометен првак Вардар дојде до нова, мошне тешко извојувана победа во Лигата на шампионите над Кристијанштад од 38-36 (21-19). Дуелот го одбележа високиот број на погодоци, меч во кој Вардар влезе одлично, со предност од шест погодоци на стартот, но во продолжението до самиот крај стравуваше за победата. „Црвено-црните“ одлично го отворија мечот, поведувајќи со 2-0, за да веќе во продолжението од мечот поведат и со +4 (8-4), благодарение на расположениот Македа кој постигна три гола во низа.
Во меѓувреме тренерот на гостинската екипа повика тајм-аут, кој не даде посакуван ефект за него. Македонскиот првак продолжи со добрата игра па така во средината на првото полувреме поведе и со до тогаш највисоки шест гола позитива (13-7).
Кристијанштад во меѓувреме заигра многу подобро, па така успеа да ја преполови негативата на нашиот првак (16-13). На ова Гонзалез одговори со пауза за совети, но и тоа не даде резултат, па така на полувреме неговите пулени заминаа само со два гола предност (21-19). Вардар влезе фуриозно во второто полувреме, па со серија од 3-0, поведе со 24-19. Сепак незгодните Швеѓани повторно се вратија, па така точно во 40. минута намалија на само еден гол негатива (27-26). Нашиот првак одново се врати на +2, притоа на неколку наврати пропуштајќи од зицер ситуација да зголеми и на +3. Противничкиот голман Симиќ беше непремостлива пречка во тие моменти, па Кристијанштад со голот на Џамали, на десет минути пред крајот успеаа и да израмни (32-32).
Тајм-аутот, кој го зеде Гонзалез даде резултат, па така со серија од 3-0, Вардар повторно се врати во водство од 35-33. До крајот на мечот се играше гол за гол, Кристијанштад цело време му „дишеше во врат“ на Вардар со еден гол негатива, но на крај победата од 38-36 остана во СЦ „Јане Сандански“. Најефикасен во македонскиот првак беше Лука Циндриќ со 8 погодоци, еден повеќе од Горбок кој даде 7 гола. Кај Кристијанштад по бројот на погодоци отскокнаа Кристијан Бјорсен и Иман Џамали кој дадоа по 7 гола.
