• Горан Упале
Македонскиот суперлигаш Вардар одигра перфектна прва фаза од новата сезона во Суперлигата. Четата на Иван Чупиќ запиша единаесет победи од исто толку натпревари и од лидерската позиција го започнува вториот круг од лигашкиот дел од домашниот шампионат.
Хрватскиот стратег воведе многу новини во таборот на „црвено-црните“ како на тактички, така и на професионален план, а тоа веднаш вроди со плод. Но, Вардар нема да застане тука и веќе размислува за идните засилувања. Веќе пишувавме за интересот за Никола Портнер, како и за бразилскиот бек Жоао Педро Франциско да Силва. За разлика од членот на Војводина, кој речиси сигурно ќе ги засили редовите на Вардар, ситуацијата со Портнер е посложена.
Портнер со Магдебург има важечки договор до јуни 2027 година, па бундеслигашот не сака да го пушти без обештетување. Наводно, германската екипа ја одбила првата понуда од „црвено-црните“, а во меѓувреме во трката за искусниот чувар на мрежата влезе и унгарскиот гигант ПИК Сегед, кој во Портнер гледа како идеално решение меѓу стативите.
Вардар моментално на голманската позиција ги има Гогов и Валах, додека Еспиња е надвор од стројот на Иван Чупиќ поради операција.
