• Иван Димовски
Скопје ќе биде домаќин на Медитеранските ракометни игри во 2027 година, откако Медитеранската ракометна конфедерација донесе одлука Македонија да ја организира 23-та едиција на машкото натпреварување.
Турнирот е закажан од 18 до 25 април 2027 година, а на него ќе настапат млади ракометари родени во 2010 година и подоцна.
Одлуката за доделување на организацијата е донесена едногласно на состанокот на Извршниот комитет на Медитеранската ракометна конфедерација на 27 август. За Македонија ова ќе биде значајна можност за организација на меѓународно младинско ракометно натпреварување, а натпреварите ќе се одржат во Скопје.
Медитеранската ракометна конфедерација истовремено ја додели организацијата и на женското издание, кое ќе се игра во Хамамет, Тунис, од 7 до 14 март 2027 година.