Симпатиите за Јапонците, бодовите за неубедливите Шпанци

Gol.mk на Светско првенство во ракомет 2019

Европскиот првак Шпанија ја запиша и третата победа во групата Б на Светското првенство и заедно со Хрватска го запоседнаа врвот со максимален учинок. Шпанците ја совладаа Јапонија и покрај бледиот прв дел со 26-22 (10-11).

Изненадувачки Јапонија подобро го отвори натпреварот, поведе со 3-0 и цели осум минути не прими гол. Шпанците правеа многу технички грешки, подаруваа топки и Шиносуке Токуда со четири гола доминираше.

Сепак, во финишот на првиот дел, европскиот првак се разбуди, Феран Соле и Алекс Душебаев постигнаа по два гола и „фуријата“ на одмор замина само со еден гол заостанување (10-11).

По одморот како да излезе некоја нова Шпанија. Коралес се разбрани, Фигуерес и Раул Ентериос го комплетира пресвртот и со серија 6-1, европскиот првак поведе со 16-12. Иако избраниците на Сигурдсон имаа блесоци со кои ги освоија симпатиите на неутралната публика, немаа сили да го откажат Коралес.

Голманот на ПСЖ одбрани седмерец и неколку зицери и со 24-20 се влезе во последните пет минути. Момците на Рибера не дозволија Јапонците да се вратат и шпаскиот тим потпиша трет мундијалски триумф (26-22).

Најефикасни поединци во шпанската селекција беа Соле со осум гола од исто толку обиди и Ентрериос со пет погодоци. Во јапонскиот табор, кој одигра одличен натпревар, се истакна Токуда со седум гола.