• Зоран Мишевски
Во голема резултатска драма од дури осумдесет минути репрезентацијата на Шпанија се избори за пласман во полуфиналето на Светското првенство во Полска и Шведска. Шпанските ѕвезду закажаа полуфинале против Данска, в петок во Стокхолм. Попладнево во Гдањск се играа дури четири продолженија и, иако беа во загубена позиција во регуларниот тек, Шпанците славеа со 35-34 (25-25, 12-13). Браќата Душебаеви и голманот Гонзало беа херои во еден од најантологиските натпревари во мундијалската историја.
Норвежаните почнаа моќно и брзо се одлепија на 7-2. Рибера повика тајм-аут и Шпанците се созедоа, Откако промашија два седмерци, шпанските ракометари ја зацврстија одбраната и за момент беше 8-8. Алекс Душебаев беше инспиратор, а лесни голови погодуваа крилата. Бергеруд беше расположен и подобриот скор на голманите донесе минимални 13-12 за скандинавските ракометари.
Со цврсти одбрани и чести израмнувања започна вториот дел. Половина од полувремето мина во знакот на одличните голмани. По пет израмнувања во вториот дел, Фигуерас од седмерец донесе само второ водство на „фуријата“ (19-20). Сепак, во краток период Норвежаните возвратија и Бјорнсен и Сагосен од седмерец ја вратија предноста на скандинавските ракометари.
При 24-22 за Норвешка, Жорди Рибера повика минута одмор и европскиот вицешампион реагираше. Даниел Душебаев и Фигуерас погодија по убави акции за 24-24 на шест минути до крајот. Важен момент во завршницата беа двата одбранети седмерци на вториот норвешки голман Северас, посебно вториот при 25-24, кога Норвежаните имаа и човек помалку. Сагосен и другарите не реализираа напад за +2 и Шпанија доби последен напад за реми. Бергеруд му одбрани зицер на Алекс Душебаев и Норвешка имаше напад на 19 секунди крајот, Но, неактивниот напад им ја одзеде топката на норвешките ракометари и Дани Душебаев со звукот на сирената погоди за 25-25 и продолженија.
Екстра времето започна израмнето, првите пет минути беа постигнати по два гола и заморот како да ги стигна двете селекции. Бергеруд и Гонзало стапија на сцена во второто продолжение и претешко беше да им се даде погодок. Алекс Душебаев погоди за шпанско водство од 29-28 на сто секунди до крајот. Гонзало Перез де Варгас му одбрани „жива топка“ на Сагосен и „фуријата“ доби меч-топка, Сепак, Шпанците ја загубија топката, а Бјорнсен погоди на седум секунди за 29-29 и нови продолженија. Гол за гол се играше и во текот на дополнителните десет минути. Ниту една селекција немаше +2, а со 34-34 се влезе во последните шеесет секунди. Даниел Душебаев погоди под закана за пасивен напад за 34-35, а Гонзало чудесно му одбрани зицер на Бјорнсен и Шпанија избори полуфинале.
Најефикасни во норвешкиот табор беа Бјорсен со девет и Бартолд со осум погодоци, а кај Шпанците по седум гола постигнаа Алекс Душебаев и Анхел Фернандез. Голманот Гонзало имаше шеснаесет одбрани, голем дел одлучувачки. Противник на Шпанија во полуфиналето в петок ќе биде селекцијата на Данска.
