• Саше Љолес
Актуелниот македонски ракометен шампион, Еурофарм Пелистер, го одработи првиот тренинг под водство на тренерот Стевче Алушовски. Ракометната легенда го презеде тимот, во обид да ги исполни големите амбиции и очекувања на управата и навивачите, а денес првпат „командуваше“ во салата „Боро Чурлески“ во Битола.
Тимот под палката на помошниците Лембанов и Соколески тренираше пет дена, а сега Алушовски го презема кормилото. „Зелено-белите“ до крајот на сезоната ќе водат голема битка за самиот врв во домашното првенство и титулите во шампионатот и Купот на Македонија. Деветте репрезентативци кои играат на Европското првенство ќе се приклучат штом завршат со обврските со националниот тим.
Еурофарм Пелистер ја продолжува авантурата во Суперлигата на седми февруари, а исто така ќе има и уште најмалку четири натпревари во Лигата на шампионите, каде се среќава со Висла Плок, ГОГ Гудме, францускиот ПСЖ и славната Барселона.
