• Горан Упале
Ракометарите на Еурофарм Пелистер се изборија за уште една рутинска победа во групата Б на Суперлигата. Во последниот денешен натпревар од групата Б, „зелено-белите“ беа надмоќни против тимот на Пролет и со 32-21 (18-12) ја впишаа дванаесеттата победа оваа сезона.
- Комплетниот натпревар меѓу Еурофарм Пелистер и Пролет:
Пелистерци веќе од поодамна обезбедија пласман во плеј-офот, додека Пролет до последно ќе боди голема битка со тимот на Голден Арт, кој вечерва убедливо го совлада составот на Прилеп.
Гостите од Скопје беа рамноправен противник само во воведните десет минути, а потоа следуваше целосна доминација на шампионот, кој, воден од Кузмановски, Пешевски и Павле Атанасијевиќ, уште во првото полувреме стави крај на сите сомнежи каде ќе завршат бодовите (18-12).
Избраниците на Ангеловски фуриозно го отворија вториот дел, цели десет минути не примија гол и се одлепија на уште поубедливи +11. Во продолжение Пролет немаше сили ниту да ја намали негативата, па за дома се врати со пораз од 32-21. Кај битолчани се истакнаа Радивојевиќ, Кузмановси, Василев и Пешевски со по четири гола, додека за тимот предводен од Александар Јовиќ, најефикасен беше Филип Aрсеновски со пет гола. Играч на натпреварот беше Марко Кизиќ, кој ги собра аплаузите од моментот кога влезе во игра, по само десетина минути. Ангеловски им даде слободен ден на Лесјак, Сери, Кисум, Нилсен...
До крајот на првиот дел од шампионатот останува уште едно коло, во кое пелистерци ќе се судрат со Прилеп, додека Пролет на свој терен ќе го пречека Бутел.
Ракомет
Суперлига 2023/24
Група Б – 13. коло
Еурофарм Пелистер – Пролет 32-21 (18-13)
Спортска сала „Боро Чурлевски“ - Битола
Гледачи: 500
Судии: Ѓорѓи Начевски и Славе Николов
Еурофарм Пелистер:
Гедбан, Кизиќ, Цехте 3, Тајник, Борзаш 3, Танкоски, Радивојевиќ 4, Кузмановски 4, Костески 2, Петровиќ 3, Пет. Атанасијевиќ 2, Ѓорговски, Васиљев 4, Пешевски 4, Пав. Атанасијевиќ 3
Седмерци: 1/1
Исклучувања: 6 минути
Пролет:
Михаљевиќ, Петковски, Јовановски, Ниновски 1, Крстески, Пецаковски 1, Кочаров 1, Додевски, Димов 2, Андоновски 4, Мајнов, Димковски 3, Стојановски 2, Димитриевски 1, Младеновски 1, Арсеновски 5
Седмерци: 4/1
Исклучувања: /
