• Зоран Мишевски
Со многу подобар впечаток отколку претходните две изданија, македонската ракометна репрезентација го заврши настапот на Европското првенство. Триесет минути им париравме на Романките, кои во вториот дел го надиграа составот на Савевски во двете фази и заслужено се радуваа на победа од 23-31.
Нашиот селектор Љубомир Савевски на официјалната прес-конференција издвои пофалби за нашата игра и залагање.
„Среќен сум што покажавме добар ракомет во првиот дел и до средината на вториот дел. Имавме само 23 гола од 54 удари, што покажува дека имавме лоша ефикасност. Но, кога играте со срце нема што да се замери на девојките. Мора да внесеме 200% од нашите можности против вакви противници.
Свесен сум дека ме критикуваат за внесувањето на неколку кадетки, но тоа се квалитетни девојчиња и во иднина ќе бидат подобри. Сепак, немавме енергија за сите шеесет минути. Се обидов со неколку измени, но тоа не е истото ниво. Ни падна и моралот, го загубивме и ритамот кога промашивме путеви од шест метри, зицери... Немавме идеја со десничар на позиција десен бек, но тоа не функционираше. Се обидовме со Кипријановска, но и тоа не функционираше.
Не сум многу разочаран, наидовме на тешка група и ќе беше поинаку ако имавме друг тип на противници во групата. Но, сега мора да се осврнеме на квалификациите за Светското првенство во април, да направиме мали корекции и да бидеме уште подобри“, заврши селекторот Савевски.
Македонија веќе напролет 2023 година ќе ги почне квалификациите за Светското првенство и ќе се обиде да го продолжи континуитетот учества на големите спо.тски приредби.
