• Горан Упале
Ракометната селекција на Македонија одново ја одушеви нацијата. Ракометарите на Кирил Лазаров режираа неверојатен пресврт пред својата публика во „Борис Трајковски“ и со победата над Фарски Острови од 34-26 повторно ќе бидат дел од ракометниот светски крем.
По тој повод, Ракометната федерација на Македонија (РФМ) им честита на ракометарите и изрази огромна благодарност до ракометната јавност и до навивачите на нашата најуспешна селекција.
Благодарност до македонската ракометна јавност
Почитувани ракометни пријатели, Ракометната Федерација на Македонија (РФМ) упатува голема благодарност до сите кои безрезервно дадоа поддршка на машката македонска сениорска репрезентација во спортскиот центар „Борис Трајковски“, за победата против селекцијата на Фарски Острови, дополнително благодарност и до сите останати кои го следеа натпреварот и ги бодреа нашите ракометари пред малите екрани.
Во рамките на своите програмски определби, Ракометната федерација на Македонија како приоритет број еден ги има промоцијата и унапредувањето на македонскиот ракометен спорт во меѓународни рамки. Во текот на репрезентативните квалификациски циклуси/баражи и утврдени натпреварувачки системи од ЕХФ/ИХФ во машка и во женска конкуренција за сите возрасни категории, националните селекции обезбедија учество на следните завршни турнири на континентално и на мундијално ниво:
1. Женска сениорска репрезентација – ЕП 2024 (Австрија, Унгарија, Швајцарија) 28.11.2024-15.12.2024
2. Машка сениорска ракометна репрезентација – СП 2025 (Хрватска, Данска, Норвешка) 14.01.2025 - 02.02.2025
3. Женска младинска ракометна репрезентација – СП 2024 (Македонија) 19.06.2024-30.06.2024
4. Машка младинска ракометна репрезентација - ЕП 2024 (Словенија) 10.07.2024- 21.07.2024
5. Машка кадетска ракометна репрезентација – ЕП 2024 (Црна Гора) 07.08.2024- 18.08.2024
Честитки до сите ракометари и ракометарки и до членовите на стручните штабови на сите македонски ракометни селекции! Вие сте наша гордост!!!
Со почит. Ракометна Федерација на Македонија“.
Македонија своите противници во групната фаза од Мундијалот во 2025 ќе ги дознае на 29 мај.
