• Иван Димовски
Македонската ракометна репрезентација за играчи до 20 години го претрпе првиот пораз на Европското првенство, откако загуби од фаворитот Франција со 18-25 (10-12). Овој неуспех не менува многу, бидејќи Македонија веќе имаше обезбедено второ место во групата и ќе разигрува за пласман од 9. до 12. место на турнирот.
„Триколорите“ отворија добро со два гола (0-2), а на тоа нашите момци имаа одговор и направија пресврт (4-2). Некое време Македонија имаше водство, во два наврати со по два гола, а потоа пред полувремето се кренаа Французите. Иако не се одлепија и се играше егал до самиот крај, на одмор се замина со наша негатива од 10-12.
Отворањето на продолжението беше подобро за противникот кој почна да гради предност. Со серија од 9-3 Франција направи висока позитива и оттогаш играше рутински до победата. На крајот, Македонија загуби со најголемата негатива на мечот од седум гола. Во таборот на Македонија четири ракометари имаа по три погодоци, а тоа беа Калајџиески, Митев, Белистојановски и Стојановски.
Во полуфиналниот плеј-оф за пласман Македонија го чека својот противник и ќе игра со првопласираната селекција од групата 2. Во моментов на тоа место е Унгарија која има 4 бода, а во игра за првата позиција се Хрватска и Словенија.
