Симултанка на Џонов, Пролет го „скрши“ незгодниот Работнички

Екипата на Пролет се намачи, но успеа да слави над повратникот во елитата Работнички (38-36), за да остане непоразен на домашно тло.

Избраниците на Матлиески важеа за фаворити, но доста добро се намачија за да освојат полн плен. Работнички цело време правеше проблеми, но во финишот, пресудија поискусните ракометари на домаќинот, за нова радост во Суперлигата.

  • Комплетниот натпревар меѓу Пролет и Работнички:

Дуелот во домот на Пролет се реши во неизвесна завршница. Работнички даде голем отпор, а резултатот беше претежно изедначен. На паузата беше 18-18, мечот продолжи во исто темпо и понатаму, а прашањето околу победникот се реши во последните десет минути.

Пред влезот во последниот дел од мечот, беше 32-31 за домашните, а Мајнов донесе плус два (33-31). Следеше техничка грешка на Работнички, па погоди Мартин Поповски (34-31), па така, до финишот на мечот Работнички само бркаше, но ниту еднаш не успеа да ја загрози победата на Пролет.

Најдобар кај домашните беше Џонов со 15 погодоци, додека кај гостинската екипа се истакна Палевски со девет гола.