• Горан Упале
Екипата на Линц не ги реализира посакуваните резултати оваа сезона во првата ракометна лига во Австрија, но нашиот интернационалец Никола Костески блеска со своите игри.
Поранешниот македонски репрезентативец е еден од најдобрите стрелци на својот тим, а неговите фантастични настапи му донесоа ново индивидуално признание. Името на Костески се најде во „дрим-тимот“ на квалификационата рунда на Спусу лигата, односно нашиот ракометар е избран за најдобро десно крило.
28-годишниот стружанец речиси на секој натпревар на Линц е меѓу најдобрите ракометари и стрелци во својот тим, а пред извесен период на натпреварот против Грац се надмина себеси и постигна рекордни ДВАНАЕСЕТ гола на еден натпревар.
И покрај тоа што квалификационата рунда на Спусу лигата Линц ја заврши на последната позиција на табелата, и во следната сезона ќе се натпреварува во елитата, затоа што Ракометната федерација на Австрија донесе одлука оваа сезона ниту една екипа од Првата лига да не испадне.
