• Горан Упале
Ракометарите на Охрид полесно од очекуваното славеа убедлива победа над директниот ривал за Европа, Тиквеш. Во салата „Билјанини Извори“ наместо дерби, видовме доминација на еден тим, а тој беше домашниот, кој на крај славеше со неверојатни 40-20.
- Комплетниот натпревар меѓу Охрид и Тиквеш:
Така, „гладијаторите“ ја продолжуваат серијата без пораз во новата сезона (четири од четири), додека Тиквеш им се врати на неуспесите и го забележа вториот пораз.
Дербито покрај езерото беше решено уште во првото полувреме. Момците на Алушовски погодуваа од секоја позиција, а на спротивната страна, Тиквеш го имаше само расположениот Мијатовиќ.
Таквата инерција донесе убедливи 21-12 на полувреме, а охриѓани немаа милост ниту во второто полувреме. Водството на домаќинот се зголемуваше од минута во минута, во листата на стрелците се запишаа и ракометарите од клупата, а на крај тоа донесе убедлива победа од дури дваесет гола разлика (40-20).
Никола Јукиќ со девет и Цицар со пет гола беа најпрецизни во победничкиот табор, додека за Мијатовиќ постигна шест гола за Тиквеш.
