Дебито на најновото засилување на Металург, Давид Шпилер и самиот ракометар веројатно поинаку го замислуваше. Но Мотор подобро ги искористи противничките грешки и славеше втор пат во два месеци против нашиот претставник (21-23).
Како реприза од претходните мечеви, Металург пак испушти шанса да слави во Лигата на шампионите и на крајот не успеа и од оваа резултатска драма да излезе како победник. Поразот од 21-23 од Мотор тренерот Лино Червар го објасни како нов пораз на искусните ракометари од кои хрватскиот тренер повторно не е задоволен.
Кога веќе ист натпревар се повторува неколку пати и епилогот е пак ист, повеќе не станува збор за случајност. Металург пак како „зелена“ и недоволно искусна екипа за Лигата на шампионите загуби од Мотор, дозволувајќи си половина полувреме да статира против тим рамен или подобар од себе. Од 40. до 52. минута играа само Украинците и заслужено го однесоа целиот плен од Скопје, отворајќи си ја вратата за наредниот круг. Поразот од 21-23 е дефинитивен удар за амбициите оваа есен на екипата на Лино Червар.
Металург загуби четири едноподруго средби во Лигата на шампионите и со тоа ги загуби и теоретските шанси за пласман во наредниот круг. Против украинскиот Мотор од Запорожје кобна беше централната фаза од вториот дел, кога гостите направија серија која им донесе триумф од 21-23 (12-9).
