Во последниот натпревар од второто коло на Европското првенство во ракомет во Полска, македонската репрезентација и домаќинот Полска го одиграа еден од највозбудливите и најинтересен натпревари во досегашниот тек на турнирот. Го запишавме и вториот по ред пораз во групата и шансата за пласман во вториот круг ќе ја бараме против селекцијата на Србија која денес убедливо загуби од Франција (36 -26).
Откако спласнаа емоциите по поразот со многу пресврти од Полска (23-24), капитенот Кирил Лазаров изрази подршка до групата на репрезентативци и лидерски се насочи кон најголемиот предизвик на ова европско првенство, мечот со Србија во вторник. Неговиот статус на Фејсбук профилот изгледа и како порака и подршка за соиграчите.
Ветеранот Славомир Шмал, исто како и нашиот Борко Ристовски, мечот го заврши со 11 интервенции, но некои од нив беа во клучната фаза од мечот. Голманот на полскиот првак Киелце ја истакна трпеливоста на своите соиграчи, иако квалитетот, како и против Франција, не беше на високо ниво.
Вториот најдобар стрелец во нашата репрезентација, Филип Миркуловски, автор на пет гола во мечот, со само една реченица го анализираше вечерашниот трилер во Краков.
Во вторник против Србија нашата селекција ја има последната шанса за пласман во втората групна фаза. Како што и планиравме, со нашиот северен сосед ќе одлучуваме кој ќе продолжи во следната фаза меѓу најдобрите 12, а кој ќе се врати дома.
Силен емоционален натпревар и борба до последната секунда го красеа мечот Полска – Македонија. Од болките и тешките гримаси по повредите на Стоилов, Миркуловски, Никола Марковски, овациите на Борко Ристовски во првиот дел, па на Шмал во продолжението, до драмата на последниот напад и воздишките на полската армија навивачи, откако приказната заврши. Сите тие емоции беа дел од третиот меѓусебен дуел на Полска и Македонија, кој за жал го добија полските ракометари.
И повторно милион драми, возбудување и за жал, одново пораз во трилер завршницата. Втор меч по ред Македонија ги заслужи симпатиите, но за жал и натаму е без бодови. Поразот од 23-24 против домаќинот Полска не е трагедија, но боли. Можеби Полјаците мечот го планираа како полесен залак, но Лазаров, Ристовски и соиграчите ги испотија полските звезди и малку фалеше да ги совладаат. Штета што наместо ние, Полјаците вечерва имаат двојно славје: победа број два на шампионатот и пласман во втората фаза.
Селекторот на македонската репрезентација Ивица Обрван, сериозен како и секогаш, на средбата со новинарите по мечот ги сподели емоциите од драматичната вечер во Краков.
Толку беа разочарани нашите ракометари по мечот и поразот од Полска, што скоро сите заминаа веднаш во соблекувалната. Немања Прибак и во зборовите и во ликот покажа дека испуштена е голема шанса да се освојат првите бодови на шампионатот.
Кога најмногу требаше, Борко Ристовски ја темпираше својата вистинска форма. Шест одбрани, која од која поспектакуларна, во првиот дел од мечот со Полска.
На почетокот делуваше загрижувачки, но испадна само „лажен аларм“. Стојанче Стоилов се пожали на болки во коленото по еден судир со Јурецки уште во раната фаза. Мораше да интервенира и лекарската служба и кратко време кружниот напаѓач помина на клупата. Но ракометарот на Вардар стегна заби и брзо се врати да им помогне на соиграчите во обидот да го комплетираат изненадувањето кое го најавија на почетокот.
Македонските навивачи делуваа обединето во моментот на интонирање на химната и од срце ја испеаа заедно со ракометарите. Моменти на тешки емоции во „вулканот“ од 15.000 луѓе во „Краков арената“, каде мечот меѓу Македонија и Полска само што започна.
Дојде викенд и бројот на Македонци во Краков е сè поголем. Главно наши луѓе од централна Европа и Скандинавија допатуваа во Полска да ги бодрат македонски ракометни асови. Последните билети, кои со посредство на интернет продажба за неколку часа беа купени минатата недела, завршија во македонски раце за нешто поголема подршка во полскиот „пекол“ вечерва.
Орни и мотивирани лица може да се видат во полчасовното загревање на македонските ракометари во „Краков арената“. Како расте андреналинот, така концентрацијата се зголемува. Со Филип Лазаров место Жарко Пешевски нашиот одличен впечаток од петокот, треба да го преточиме во комплетно издание, до првите бодови на шампионатот.
Денес во фан зоната во центарот на Краков беше организиран шах натпревар помеѓу македонските и полските навивачи. Добар начин на дружење, за оние на кои не им е до разгледување на градот по студеното време. Древната игра може да биде асоцијација и за ракометниот дуел вечерва, во кој Ивица Обрван и Михаел Биглер ќе се надмудруваат како на шаховска табла. Чија стратегија ќе биде поуспешна.
Недела е и голема раздвиженост низ Краков. Најтуристичкиот полски град е исполнет со сè повеќе македонски навивачи. По кафулињата и рестораните во центарот на градот, во фан-зоната и низ кафеаните каде се задомаќинија, членовите на „Фалангата“ одлично ги минуваат деновите во Краков.
И во претпладневните часови температурата во Краков е под нулата. Сепак, тоа не ги спречи многубројните туристи и навивачите на четирите земји кои играат во А групата на Европското првенство во ракомет да ги видат убавините на градот.
Ако има противник кој му лежи на нашиот капитен, тоа е Полска. Без разлика што генерациите и системот на игра се менуваат, тактички гледано, квалитетите и интелигенцијата на Кире Лазаров секогаш биле проблем за полскиот национален тим. Асот на Барселона признава дека дефанзивната игра и конституцијата на полските бекови и нам ни лежи.
Како тактички да ѝ се спротиставиме на Полска, кои се послабите страни на селекцијата на Михаел Биглер и каде треба да ја гледаме нашата шанса вечерва пред мечот со домаќинот на 12. европско првенство во ракомет. Тоа се прашања кои деновиве сите си ги поставуваме. Веројатно стручниот штаб добро го скаутирал противникот, а со тоа ги знае и добрите и лошите страни. Бившиот селектор Стевче Стефановски смета дека Македонија има шанси, а „ахилова пета“ на полскиот тим е селекторот Биглер.
Само малку ракометари во нашиот тим играа и беа директни протагонисти во победите над Полска во 2009 и 2012 година. Останатите се мотивираат гледајќи ги тие натпревари, исто како и навивачите. Немања Прибак ја потенцира предноста на домашниот терен, но и психолошкиот момент со нашата поволна традиција, кога играме со Полска.
Ново ладно утро во Краков. Температурата околу нулата, иако нов снег нема. Стотина македонски навивачи, откако синоќа го почувствуваа викенд ритамот на Краков, утрово веќе се подготвени за голем ракометен ден.
Капитенот на Вардар, Филип Лазаров, ќе дебитира на ова европско првенство вечерва против Полска. Селекторот Ивица Обрван го пријави во составот за вечерашниот натпревар од 20.00 часот.
Во Вараждин во јануари 2009 година, Македонија за првпат се сретна и ја совлада Полска со 30-29. Капитенот Кире Лазаров постигна 13 гола, а таа победа, без разлика што не ни донесе пласман во полуфиналето, е окарактеризирана како една од нашите најголеми победи на сите времиња. На нашата клупа седеше Темелковски, а покрај Кире Лазаров уште и Мојсоски, Борко Ристовски и Филип Лазаров беа дел од оваа приредба.
Мечот со Полска вечерва е и најава за голема физичка средба, меч на цврсти одбани и атлетски врвни спортисти. Отсекогаш полските ракометари важеле за големи и снажни момци, а ниту денешните репрезентативци не се исклучок. Но, и ние имаме свои сили, па со Жарко Пешевски како ново име на линијата од шест метри, добиваме на сила и на ракометна техника.
Крилата на мечот против Франција функционираа фантастично и надеж во нив имаме и за утрешниот меч против Полска. Дејан Манасков е наш голем адут и на поставена противничка одбрана и при полуконтри и контри. Тој открива што донело скаутирањето на противникот од мечот со Србија синоќа.
Опуштена атмосфера, малку кошарка за загревање, шеги и комбинации го красеа почетниот дел од денешниот тренинг на македонската репрезентација во малата „АВФ арена“ во Краков.
По утринскиот тренинг во „Краков арената“ попладнево македонските ракометари имаа едночасовен тренинг во малата „АВФ арена“ во непосредна близина на салата каде се играат натпреварите. Нашите репрезентативци и селекторот говореа пред новинарите и делуваа многу самоуверено, сигурно и мотивирано.
