• Зоран Мишевски
Алкалоид на „зелена маса“ го доби победничкиот пехар во Европскиот Куп откако ЕХФ одлучи да го регистрира неодиграниот реванш од финалето против АЕК со службени 10:0 за нашиот тим, бидејќи Грците одбија да истрчаат на теренот.
Eкипата на Алкалоид предводена од Кире Лазаров, со две победи (29-25 во Грција и службените 10-0 во реваншот) официјално е прогласена за победник во натпреварувањето под капата на ЕХФ.
Првиот европски трофеј на младиот скопски клуб му го честита и претседателот Живко Мукаетов.
„Со визија изградена врз млади македонски таленти, силна верба во тимот и професионализам според светски стандарди – РК Алкалоид испиша нова страница во европскиот ракомет. Многумина не веруваа дека е возможно да се стигне толку брзо од салата во Автокоманда до врвот на Европскиот Куп, но малку е ако кажам дека ми е навистина драго што успеавме!
А како? Со напорна работа, максимална посветеност, силен тимски дух, верба во фер-плејот и лидерство какво секој би посакал на клупата. Искрени честитки и од срце ОГРОМНО благодарам на Кирил Лазаров, кој и официјално стана прв македонски тренер во историјата на македонскиот ракомет кој освоил Европски трофеј.
Огромно БРАВО за момците кои јуначки и витешки се бореа на секој меч! Секоја чест на стручниот штаб за професионално сработените задачи - докажавме дека со чесен, искрен и транспарентен пристап, без скриени ракавици и задкулисни игри, успехот секогаш сам доаѓа!
За крај, и над сѐ, благодарност од СРЦЕ на прекрасната публика: вработените во Алкалоид, прекрасните „Кафетинки“, подмладокот од Алкалоид и Мулти есенс, кои безрезервно ги бодреа своите идоли, како и непоправливите „ентузијасти“ кои верно нѐ следат на секој натпревар.
Поздрав од плаво-белите од Автокоманда!
Одиме понатаму
Со верба во себе и верба во Бога!
НАПРЕД АЛКАЛОИД!“, напиша Мукаетов на социјалните мрежи.
Алкалоид сезоната ја заврши со два трофеи, бидејќи на почетокот го освои и Суперкупот на Македонија, со победата во Гевгелија против Еурофарм Пелистер.
