• Иван Димовски
Екипата на Пролет го продолжи договорот со Данило Михаљевиќ на уште една година.
Искусниот голман пристигна во скопскиот тим минатото лето, ги задоволи барањата на управата и заслужено доби нов договор. Двете страни без потешкотии ги договорија деталите и Михаљевиќ стави потпис.
„Презадоволни сме од сето она што Данило го покажа на голот на Тинекс Пролет од моментот на неговото доаѓање па се до ден денеска. Тој е вистински професионалец, играч што е тука за тимот и за соиграчите и презадоволни сме што останува во Пролет уште најмалку една година.
Нема дилема дека повторно ќе атакуваме на висок пласман, цел ни е најпрвин да влеземе во плејофот, а потоа и да се бориме за место во Европа. Младите играчи кои добија шанса изминатите месеци ќе бидат поискусни, речиси сите првотимци ќе останат, а во преговори сме за доведување на две до три квалитетни засилувања“, изјави директорот на клубот, Сашо Огњеновски.
Пролет сезонава не успеа да се бори за Европа, туку во плеј-офот го зазема последното осмо место. Клубот сезонава остана без неколку клучни ракометари, меѓутоа директорот најави засилување на ростерот и високи амбиции за следната сезона.
