• Мартин Танасковски
Скопје е подготвено да биде домаќин на Светското училишно првенство во ракомет, кое ќе ги собере најдобрите млади селекции од целиот свет. Ждрепката ги одреди групите, а македонските тимови добија интересни и предизвикувачки противници.
Машката репрезентација на Македонија ќе настапи во групата А, каде ќе се соочи со селекциите на Република Српска, Грузија, Бугарија и Саудиска Арабија. Женската селекција, пак, ќе игра во групата Ц, заедно со Белгија, Грузија и Словачка.
Селектор на машкиот состав е Горан Кузманоски, додека женската репрезентација ја предводи Даниела Новеска. И двата тима ќе имаат можност пред домашна публика да го покажат својот потенцијал и да се борат за висок пласман.
На шампионатот ќе учествуваат вкупно 36 држави во машка и женска конкуренција, што го прави овој настан еден од најмасовните во училишниот спорт. Сите делегации веќе пристигнаа во Скопје и со нетрпение го очекуваат почетокот на натпреварите.
Свеченото отворање ќе се одржи на Плоштад Македонија, со почеток од 19:30 часот, каде е предвидено дефиле на учесниците проследено со музичка и забавна програма. Натпреварите официјално започнуваат на 22 април.