• Горан Упале
Ракометниот клуб Пари Сен Жермен го впиша вториот овосезонски трофеј од домашната сцена, откако во големото финале од Купот на Франција пред својата публика со убедливи 31-36 го совлада составот на Нант, на последниот натпревар на македонската легенда Кирил Лазаров.
Големото дерби на двете најдобри француски екипи започна со квалитетна и израмнета игра. Нант имаше решение за секој налет на шампионот, но како одминуваа минутите во првиот дел, така ПСЖ фаќаше ритам, а предводник беше холандскиот ас Стејнс. Еден од најниските бекови во вистински момент го разигра својот тим и ѝ направи многу проблеми на противничката одбрана, а тоа донесе сигурно водство на ПСЖ на полувреме од пет гола разлика (13-18).
Холандскиот ас беше расположен за игра и на стартот од вториот дел, но овој пат на неговиот пат застана фантастичниот Робин. Голманот на Нант во вистинско време влезе во серија и со неколкуте одбранети зицери во низа им овозможи на своите соиграчи лесни голови и водството на ПСЖ почна да се топи.
Во нападот на Нант се приклучи и нашиот Лазаров, но ПСЖ брзо се созеде и ја врати комотна предност. Во последните десет минути се влезе со плус шест за домашниот тим, по што беше јасно каде ќе заврши трофејот. На крај ПСЖ славеше победа од 31-36.
