Лазаров: Планот не ни успеа, но верувам во овие ракометари повеќе од самите што веруваат!

Непреспиена ноќ и многу грижи за македонските ракометари по вчерашниот пораз од Црна Гора со 28-24 во Дебрецин. Елиминацијата во групната фаза на големите натпреварувања не е дел од нашите навики во последната деценија, но со сигурност е реална слика на нашата смена на генерации.

На денешната средба со новинарите селекторот Кирил Лазаров го анализираше лошото вчерашно издание.

„Идејата ја имам од моето поставување како селектор и продолжуваме напред. Поразот боли, но сакам да истакнам дека она за што се спремавме, да настапиме комплетни како во квалификациите, не ни успеа. Не е иста оваа репрезентација без Лазаров, Маркоски, Митрески, Ојлески, Стоилов, Манасков, без невакцинираните. Планот беше да дојдеме комплетни и да им се спротиставиме на сите. Не е ова алиби, туку реална ситуација.

Загубивме два натпревари, првиот гордо, со многу жар и борба. Можеби тоа не наведе да помислиме дека можеме лесно да ја победиме Црна Гора. Но, ние ги мотивиравме Црногорците. Тие имаат одлични индивидуалци, споредувајќи во кои клубови играат нивните и нашите ракометари, тие се во предност. 

Прегледувајќи го натпреварот увидов дека сме на добар пат. Стојам зад овие зборови. Оптимист сум и прифаќам критика. Почнуваме од нула, но за кратко ќе разговараме кој грешел и зошто грешел. Верувам во репрезентацијата, можеби јас повеќе од ракометарите. Им недостига тој победнички менталит, велат се раѓа спортист со таков менталитет. Но, може да им се вгради таков менталитет.

Играме брз и модерен ракомет и вчера бевме блиску до победата. Имам и јас грешки и треба да ги поправам. Можеби победа синоќа ќе ја натераше оваа репрезентација да полета. Вака имам јасна слика и не само играчки, туку и карактерно. Некогаш и ако си послаб ракометар, но имаш добар карактер - заслужуваш место во овој тим. Нема лесно да се предадам, ми се случувале вакви работи и во играчката кариера. Имаме напредок, но тоа треба да го преточиме во победи и успеси“, рече Лазаров.

Попладнево македонската репрезентација редовно ќе тренира, а утре од 20:30 часот против Данска ќе го одигра последниот натпревар на турнирот.