• Мартин Танасковски
Екипата на Рајн Некар Левен забележа нова победа во ракометната Лига на Шампиони, откако како гостин во Шведска потешко од очекуваното славеше над Кристијанштад (29-31).
„Лавовите“ важеа за фаворити, но екипата од дното на табелата во групата во која е и Вардар направи доста проблеми. Уште по првото полувреме Кристијанштад даде до знаење дека нема да се предаде, откако замина на пауза со предност од еден гол (16-15), а потоа, дојде и до предност од два гола (21-19), која не успеа да ја задржи во продолжението од мечот, кога искуството исплива на површнина.
Рајн Некар најпрво од 23-23 успеа да се одлепи на 23-25, а потоа и мирно во завршница да го приведе мечот кон посакуваниот триумф. Најефикасен во победата на „лавовите“ беше Баена Гонзалес со 8 гола, а Шмид додаде уште 7, додека кај домаќинот Гудмунсон даде десет гола. Во составот на Германците ги немаше двајцата македонски репрезентативци Филип Талески и Дејан Манасков, едниот поради немање право за настап, а вториот поради повреда.
Рајн Некар Левен сега е втор во групата со 15 бода, веднаш зад Вардар кој има 16 бода.
