• Мартин Танасковски
Македонската машка кадетска репрезентација го освои деветтото место на Европското првенство, откако во последниот натпревар славеше убедлива победа над Израел со 39-29.
Избраниците на селекторот Горан Кузманоски до триумфот стигнаа благодарение на одличното второ полувреме, во кое целосно го надиграа противникот. Воедно, младите македонски ракометари по вторпат за неколку месеци покажаа дека се подобри од Израел, откако претходно славеа и во финалето на Светското училишно првенство.
Првото полувреме не мина според посакуваното сценарио за Македонија. Израелците имаа иницијатива и во еден момент поведоа со четири гола разлика (10-14), а на паузата заминаа со минимална предност од 20-19.
Сликата на теренот целосно се промени по одморот. Македонија силно го отвори вториот дел и брзо направи пресврт за водство од 22-20. Нашите кадети потоа постепено ја зголемуваа разликата, а со серија од 9-0 стигнаа до убедливи 38-28 и практично го решија победникот.
Најефикасен во македонскиот состав беше Дамчевски со осум погодоци, исто толку постигна и Ѓорѓиески, додека Вујичевски додаде шест гола во убедливата победа. Со овој триумф Македонија го заврши шампионатот на деветтото место и потврди дека поседува генерација со голем потенцијал за иднината.
