• Мартин Танасковски
Александар Јовиќ и Звонко Шундовски го загубија првото дерби со Еурофарм Пелистер против Вардар 1961 во Скопје (31-24) и ќе биде пеколно тешко да се дојде до посакуваната титула на домашната сцена. По мечот, тренерот на пелистерци направи анализа и кажа дека по прекинот тимот не изгледал исто на терен, а истовремено го апострофира искуството кое играчите на Вардар го имаат во овие дерби-натпревари.
„Искрено, не очекувавме да одиграат нашите играчи на ваков начин. Почнавме добро, но по прекинот, што е недозволив на вакви натпревари, излеговме на терен како друга екипа. Дали заради тоа што имаме многу играчи што немаат почувствувано вакво нешто или нешто друго, ние бевме сосема други по прекинот. Вардар не ловеше на секоја грешка и заслужено победи со голема разлика.
Вардар има голема предност, без разлика што нема широк ростер, ги има играчите-победници како што се Талески, Манасков, Георгиевски, Стоилов, Томовски, Ристовски... така што мислам дека имаме време да анализираме каде грешевме. Екипата ни покажа второ лице од она против Нексе и мора да ги детектираме сите аномалии пред вториот дуел во Битола. Нашето првенство е квалитетно, има и други натпревари за играње, не смееме да заборавиме на Тиквеш, Алкалоид, Охрид... Додека не се реши се, не може да кажеме кој е шампион. Вардар е во голема предност, но има уште да се игра“, изјави Јовиќ.
Ова беше прв пораз за Еурофарм Пелистер на домашната сцена сезонава. Вардар е единствен без неуспех во плеј-офот. Второто дерби се игра во мај.
