• Мартин Танасковски
Европската ракометна федерација (ЕХФ) ги објави натпреварите што ќе го носат престижниот епитет „меч на неделата“ во рамките на тековната сезона од Лигата на шампионите. Меѓу нив се најде и македонско-унгарскиот дуел меѓу Еурофарм Пелистер и ПИК Сегед, кој ќе се одигра во седмото коло од групната фаза.
Изборот на овој натпревар не е случаен, ЕХФ очекува возбудлив и драматичен ракометен спектакл во Битола, со оглед на тоа што и двата тима имаат што да докажат по променливиот старт на сезоната. Еурофарм Пелистер по шест одиграни кола има биланс од една победа и пет порази, но покажува знаци на подем и решителност да го врати натпреварувачкиот ритам. На другата страна, ПИК Сегед досега забележа три победи и три порази, па средбата во „Боро Чурлевски“ ќе биде од исклучително значење за двата тима.
Битолчани ќе имаат моќна поддршка од домашната публика, која традиционално создава една од најжешките атмосфери во Европа. Од ЕХФ велат дека токму оваа енергија и традицијата на македонскиот шампион биле меѓу главните причини зошто токму овој натпревар е избран за централно внимание во седмото коло.
Натпреварот меѓу Еурофарм Пелистер и ПИК Сегед е закажан за 12 ноември во салата „Боро Чурлевски“, со почеток од 20:45 часот.
