• Иван Димовски
Ракометарите на Еурофарм Пелистер 2 ја запишаа првата победа во новата сезона, откако на свој терен го совладаа Скопје 2020 со 37-22 (19-10). Пресметката во „Боро Чурлевски“ во целост му припадна на домаќинот, кој го надигра скопскиот ривал и на крајот убедливо го доби дуелот. Овој резултат е добар за момците на Михаил Петревски по воведниот пораз од Тиквеш.
- Комплетниот натпревар меѓу Еурофарм Пелистер 2 и Скопје 2020:
Средбата тргна со три гола на пелистерци, кои веднаш се наметнаа и покажаа дека се голем фаворит. Иако скопјани успеаја да пријдат на 4-1, тоа беше сè од нив. Еурофарм Пелистер 2 почна да гради предност која бргу котираше само над четири гола. До полувремето битолчани дополнително се одлепија и на одмор заминаа со 19-10, а претходно имаа и двоцифрено водство.
Продолжението не понуди којзнае колку измени во темпото. „Зелено-белите“ продолжија да диктираат темпо и да градат поубедлива предност, а Скопје немаше решение за тоа. Одново пред завршницата битолчани поведоа двоцифрено, за на крајот да забележат навистина убедлив триумф. На крајот, Еурофарм Пелистер 2 слави со највисоката предност на средбата од 15 гола.
Најефикасни во победничкиот табор беа Стефан Трпчевски и Ненад Белистојановски со по шест реализации, додека кај скопјани се истакна Андреј Митиќ со еден гол помалку.
Суперлига 2023/24
Група А – второ коло
Еурофарм Пелистер 2 – Скопје 2020 37-22 (19-10)
Спортска сала: „Боро Чурлевски“ – Битола
Гледачи: 500
Судии: Виктор Андонов и Стојанче Јовановски
Еурофарм Пелистер 2:
Штаковски, Младенов, Маркоски 1, Талевски 1, Ристевски 3, Митревски 5, Мирчески, Димовски 4, Трпчевски 6, Димитровски 2, Калајџиовски, Пецаковски 1, Ивановски 4, Белистојановски 6, Југовски 1, Мијушковиќ 3
Седмерци: 4/3
Исклучувања: 10 минути
Скопје 2020:
Стојкоски, Фидановски 2, Мишевски 4, Чакалиќ, Тркалевски, Шокоски 3, Огнановски, Митиќ 5, Ристовски 1, Фичорски 1, Пешкирски, Грујовски 3, С. Стојановски 1, Киселовски 2, Ферукоски., К. Стојановски
Седмерци: /
Исклучувања: 10 минути
