• Саше Љолес

Машката ракометна репрезентација ќе има интересни предизвици периодов. Сениорите во рамките на ЕХФ неделата (11-17 март) ќе одиграат два пријателски натпревари против Романија. Двата меча ќе се одржат на 15 и 16 март во градот Браила и ова ќе биде одличен тест за нашите момчиња пред бараж-дуелот за пласман на Светското првенство, каде Македонија ќе се соочи со незгодната селекција на Фарските Острови.
Избраниците на селекторот Кирил Лазаров успеаја со еден триумф над Швајцарија да го комплетираат настапот на Европското првенство во Германија, каде Фарските Острови се прикажаа во одлично светло и им „откинаа“ бодови на неколку фаворизирани селекции.
Свои настапи во рамките на ЕХФ неделата ќе имаат и репрезентациите во младинските категории. Јуниорите ќе бидат домаќини на Хрватска и во Скопје ќе одиграат два меча (15 и 16 март), додека кадетската репрезентација ќе одигра исто така два натпревари против Црна Гора, а овие дуели на програмата се на 14 и 15 март.