• Горан Упале
Извршниот комитет на Европската ракометна федерација на својот состанок во Ротердам во саботата, го отвори патот за нова ера на европскиот клупски ракомет. Веќе е познато дека Лигата на шампионите од следната сезона ќе се прошири на 24 екипи и ќе се воспостави нов формат. Извршниот комитет го потврди системот за распределба на местата за елитното натпреварување. Основата за распределбата е рангирањето на федерациите за клупските натпреварувања, вклучувајќи ги резултатите од сезоните 2022/23, 2023/24 и 2024/25.
Федерациите рангирани од првото до десеттото место имаат едно фиксно место во Лигата на шампионите. За следната сезона овие федерации се Германија, Шпанија, Франција, Данска, Полска, Унгарија, Романија, Португалија, Хрватска и Норвешка. Тоа значи дека Македонија нема да има место за директен пласман во Лигата на шампионите, туку шампионот шанса ќе бара преку „вајлд-карта“.
Секоја од овие десет најдобри федерации има право да побара до две дополнителни „вајлд-карти“, а ЕХФ ќе може да додели најмногу осум. Бројот на тимови по федерација е ограничен на максимум три.
24-те екипи ќе бидат поделени во шест групи по четири екипи, од кои дванаесет ќе се пласираат во главната рунда, а останатите дванаесет продолжуваат во 1/16 финалето од Европската лига. Ждрепката за групите ќе се одржи на 26 јуни во Виена.
