• Мартин Танасковски
Во присуство на повеќе од 10.000 гледачи, легендарниот германски пивотмен со полско потекло, Патрик Винчек, и официјално ја заврши својата професионална ракометна кариера со свечена проштална средба.
Настанот се одигра во пријателска атмосфера, каде симболично се сретнаа екипата составена од германски ракометари со полски корени и неговиот долгогодишен клуб Кил. Победата ја однесоа гостите со резултат 33-28, а Винчек го заврши натпреварот со одлични десет погодоци, заокружувајќи ја својата кариера во стилот што го одбележа неговиот професионален пат.
Патрик Винчек зад себе остава импресивна статистика – за Кил одигра 659 натпревари и постигна 1.592 гола. Со овој германски ракометен гигант освои шест титули во Бундеслигата, пет трофеи во Купот на Германија и беше дел од тимот кој во 2020 година триумфираше во Лигата на шампионите.
Во дресот на германската репрезентација, Винчек исто така имаше значајна улога, а еден од врвовите на неговата репрезентативна кариера беше бронзениот медал на Олимписките игри во Рио де Жанеиро во 2016 година.
Со овој свечен настан, ракометниот свет се прости од еден од најдоминантните пивотмени на својата генерација, чиј придонес ќе остане запаметен во историјата на Кил и на германскиот ракомет.
