• Мартин Танасковски
Македонија има ден одмор, па следи натпреварот против Романија, последен во рамки на првата групна фаза на Европското првенство (ЕП) кое се игра во Македонија, Словенија и Црна Гора.
Сања Дабевска го најави дуелот со Романките кој ќе биде за следна фаза. Франција и Холандија се веќе таму, а победникот од овој натпревар ќе биде третиот тим кој оди во втората рунда.
„Клучната разлика од претходните две средби е што Романија поблиску е до нас, не се како Франција и Холандија да играат толку брз ракомет, играат нешто поспоро. Нашата шанса ќе ја гледаме тука, се надевам дека може да ни се посреќи и со наш ден да дојдеме до победа.
Очекуваме борбен натпревар, ќе има многу „тепање“ на терен и се надевам дека резултатот ќе биде во наша полза. Сакаме поддршка и од публиката која ни е златна. Криво ни е што не ги израдувавме досега со победа, но се надевам во последната рунда ќе го направиме тоа“, изјави Дабевска.
Натпреварот меѓу Македонија и Романија се игра во СЦ „Борис Трајковски“, во среда од 18:00 часот.
