• Горан Упале
Екипата на Бенфика им се врати на победите во Европската лига, откако по болниот пораз од Будасоа во претходното коло, вечерва ја забележа можеби клучната победа во групата 2 од втората фаза од второто по ранг натпреварување на ЕХФ.
Во Португалија совладан беше тимот на Иштад од Шведска со 36-31, на полувреме 18-14. Македонскиот интернационалец Филип Талески немаше свој придонес во нападот во оваа победа на Бенфика. На две кола до крајот Бенфика си обезбеди место во осминафиналето, а колку коцките ѝ се наместат може да стигне и до првото место во групата, кое носи пласман во четвртфиналето.
Ракометарите на Тулуз приредија изненадување во Германија, откако останаа непоразени на тешкото гостување кај Флензбург (34-34). И покрај ремито бундеслигашот е сигурен на лидерската позиција со два бода повеќе од Тулуз.
На останатите натпревари Татабања пред својата публика загуби убедливо од Гумербах (29-44), додека ГОГ на домашен терен беше поуспешен од Монпелје.
