• Мартин Танасковски
Екипата на Тулуз вторпат загуби од Вардар во Европската лига. Вториот пат беше во Скопје во последното коло, повторно во ефикасен меч кој понуди 72 гола (35-37). По мечот, тренерот Даниел Анѓелковиќ му честиташе на ривалот.
„Сакам да му честитам на победникот. Вардар одигра одлична групна фаза. Претставуваат дел од Европа од кој доаѓаме и ние, па навиваме за вас во продолжението. Дојдовме тука за да одиграме добар натпревар, да ја почувствуваме атмосферата во Скопје иако салата не беше полна. Научивме нешто и од тоа, бидејќи во Франција немаме многу шанси за да играме вакви натпревари. Што се однесува до дуелот, се боревме и водевме на полувреме, ама на крајот претрпевме пораз“, изјави Анѓелковиќ.
Свое обраќање имаше и Немања Илиќ кој долги години игра во дресот на францускиот клуб
„Честитки до Вардар за победата и пласманот. Во двете средби беа подобри од нас. Тие се поискусна екипа од нас и тоа пресуди. Натпреварот тука немаше резултатско значење, ама се обидовме да одиграме што е можно подобро. Се обидовме да држиме ритам и се боревме, ама на крајот загубивме“, изјави Илиќ.
Тулуз ја заврши групната фаза без освоен бод, што е разочарување за екипата. Во следната рунда покрај Вардар, оди и Кристијанштад од Шведска.
